呢排睇無綫套《婚姻合伙人》，有幾場戲黃德斌就喺西九龍中心上面嗰個溜冰場打波，令唔少觀眾諗起上面嗰架過山車。話說阿史以前都搭過，但架過山車自2003年開始停駛至今，大家平時行開嗰頭望到架車，相信都會懷念呢個經典設施。

架過山車以前叫做天龍過山車，响1994年揭幕，藝人陳小春同謝天華都做過代言人拍廣告，此外亦有唔少藝人例如謝霆鋒、黎明等，喺商場出席活動時都坐過呢架過山車，當年最平只需15蚊就可以搭3轉。

至於點解呢架過山車响2003年停駛，多年來傳出過唔少傳聞，又話有鬼又剩，其實有商場職員解釋過，當初係因為美國發生過室內過山車意外，高層因為安全起見而決定停駛，但去到前年仍然有人定期做保養同維修，符合牌照要求。

原圖取自網絡。